A conselleira do Mar, Rosa Quintana, defende a necesidade de modificar os coeficientes redutores da idade de xubilación das mulleres que traballan no sector marítimo-pesqueiro para igualar os daquelas actividades do sector no que a presenza masculina é maioritaria. A medida, ao seu xuízo, serviría para compensar o duro traballo destes profesionais, como as mariscadoras ou as redeiras, e eliminar as diferenzas existentes na actualidade.
Así o indicou a conselleira nunha reunión mantida en Santiago coa Asociación Nacional de Mulleres Pesqueiras (Anmupesca), na que tamén participou a secretaria xeral da Igualdade, Susana López Abella.
Rosa Quintana lembrou que a Xunta defende esta modificación dende 2019 e recentemente trasladase ao Goberno central unha proposición non de lei do Parlamento de Galicia na que se insta a iniciar o proceso de revisión dos coeficientes redutores da xubilación e adaptalos aos as circunstancias actuais da frota e da actividade marítimo-pesqueira, marisqueira e acuícola. En definitiva, reclama que estes parámetros se adapten “segundo o risco ou o recoñecemento de enfermidades profesionais propias da rutina laboral”, sinala Mar nun comunicado.
Ademais de constituír un gran paso no recoñecemento da profesionalización da muller, “conseguiría que as vindeiras xeracións se sintan atraídas por este tipo de actividades, aludindo á importancia de asegurar a remuda xeracional neste sector”. Por iso, agradeceu o traballo desenvolvido pola Anmupesca a prol da igualdade salarial entre homes e mulleres, así como a mellora da conciliación da vida laboral e familiar.
