As algas consolídanse como un recurso clave nun inicio de ano marcado polas choivas e a paralización parcial do marisqueo
A Organización de Produtores Pesqueiros OPP20 – Marisco de A Illa continúa realizando o seguimento da evolución da actividade comercial da Lonxa do Xufre a través dos datos de trazabilidade e comercialización, unha ferramenta fundamental para coñecer a realidade do sector e a evolución das campañas extractivas.
Durante os meses de xaneiro a abril de 2026, a Lonxa do Xufre rexistrou a comercialización de 143.797,50 quilos de produto, cun valor económico acumulado de 315.212,50 euros, nun período marcado polas condicións meteorolóxicas adversas e pola variabilidade da actividade marisqueira.
Nos primeiros meses do ano mantívose a comercialización de especies marisqueiras de alto valor comercial, como distintas variedades de ameixa, navalla, longueirón ou berberecho, combinadas xa cun peso relevante das algas mariñas, especialmente leituga de mar, wakame, correa, kombu e ramallo de mar, que estiveron presentes de forma constante nas vendas da OPP20.
Tal e como xa se sinalara na avaliación do inicio da campaña, o mes de marzo estivo especialmente condicionado polas consecuencias das intensas choivas, que afectaron de maneira directa á actividade marisqueira e provocaron unha forte limitación na dispoñibilidade dalgunhas especies. Neste contexto, a comercialización de algas e doutros recursos permitiu soster parcialmente a actividade económica da lonxa, nun momento especialmente complexo para o sector. A actividade marisqueira viuse fortemente condicionada polas limitacións derivadas das condicións ambientais, obrigando ao sector a adaptarse á dispoñibilidade real de recursos.
En abril observouse unha recuperación do volume comercializado, acadándose 84.496,20 quilos de produto, aínda nun escenario de adaptación ás condicións ambientais e de evolución desigual segundo as especies. A información obtida a través da trazabilidade permite interpretar estes cambios con maior precisión, identificando non só o volume e valor das vendas, senón tamén a composición da actividade extractiva en cada momento.
A través desta medida, integrada no Plan de Produción e Comercialización (PPeC) 2026 da OPP20, a entidade reforza o seu compromiso coa transparencia e coa valorización dos produtos do mar da Illa de Arousa, achegando información obxectiva sobre a evolución das campañas e a realidade do sector pesqueiro e marisqueiro. Esta actuación forma parte dun plan cofinanciado pola Xunta de Galicia e o Fondo Europeo Marítimo, de Pesca e de Acuicultura (FEMPA), orientado a impulsar a competitividade, sustentabilidade e posta en valor dos produtos pesqueiros e marisqueiros.
