A OPP20 consigue que a nova imaxe de Marisco de A Illa sexa Marca da Unión Europea.
Neste ano 2023, co desenvolvemento de novas campañas de promoción e co establecemento de acordos de colaboración que permitirán á OPP20 que a marca Marisco de A Illa sexa mantida na etiquetaxe en diferentes operadores da cadea de valor, fíxose patente a necesidade de renovación da imaxe da marca.
Unha imaxe máis actual, sen perder a esencia da orixinal, pero que permita á OPP modernizar o selo. Para conseguilo optouse por sintetizar a mensaxe, e coas cunchas do logo antigo fíxose unha “D” que significa “Marisco de”, e logo a palabra illA, pero cun apóstrofe enriba que ven a dar a entender xunto ás cunchas “Marisco de A Illa”.
Tras a creación desta nova imaxe, procedeuse a rexistrala como Marca da Unión Europea, a cal foi xa concedida co código 018855647.
Así, a OPP20 prepara unha nova etapa na promoción e comercialización dos seus produtos cunha folla de ruta ben trazada e unha imaxe moderna asociada ó consumo de marisco de calidade procedente dun oficio tradicional, que fará chegar a marca a unha audiencia cada vez máis ampla a través das canles de comunicación da OPP. Prestixio e recoñecemento que se verá traducido nunha mellora do prezo de venda dos seus produtos marisqueiros.
