A actividade comercial da Lonxa do Xufre durante os primeiros meses de 2026 reflicte a evolución habitual da campaña marisqueira, marcada este ano polo forte impacto dos episodios de choiva rexistrados na segunda quincena de febreiro.
Tras a parada do Nadal, o mes de xaneiro supuxo unha recuperación progresiva da actividade, especialmente no marisqueo a pé, que retomaba pouco a pouco o traballo nos bancos marisqueiros. Neste período, as principais especies comercializadas foron a ameixa xapónica, a ameixa rubia, o longueirón vello e a navalla, xunto cun importante volume de algas mariñas procedentes da actividade extractiva da Illa de Arousa.
Durante febreiro, e a pesar do descenso da actividade provocado polas intensas precipitacións das últimas semanas do mes, a lonxa conseguiu superar o importe comercializado en xaneiro. Neste contexto, a estabilidade da ameixa xapónica e o importante peso comercial das algas —especialmente wakame e ramallo de mar— resultaron claves para manter a actividade comercial nun momento xa complicado para outras especies máis sensibles ás variacións de salinidade e ás achegas masivas de auga doce.
Pola contra, especies como o longueirón vello ou a navalla comezaron xa a rexistrar unha baixada significativa nas cantidades comercializadas, coincidindo co empeoramento das condicións ambientais nos bancos marisqueiros.
Os datos provisionais de marzo apuntan xa ás consecuencias máis preocupantes deste episodio meteorolóxico prolongado. A recuperación dos bancos marisqueiros será lenta e dependerá da evolución das condicións ambientais nas próximas semanas, nun contexto especialmente delicado para o marisqueo a pé da ría de Arousa.
Esta acción enmárcase no PPeC 2026 da OPP20, cofinanciado pola Xunta de Galicia e o FEMPA, dentro das accións divulgativas de |OPP20TRAZABILIDADE.
