A OPP20 pecha as actividades de SENSIMAR A PÉ DE PRAIA cun total de 134 nenos e nenas sensibilizados e medio centenar de adultos.
SENSIMAR é unha iniciativa que a OPP20 comezou a traballar en 2021 nas escolas para sensibilizar ós máis pequenos sobre a importancia do coidado dos recursos naturais da zona costeira para que actividades tradicionais e sostibles coma o marisqueo poidan levarse a cabo.
En 2022, SENSIMAR levouse a pé de praia aproveitando os meses de verán de xullo e agosto, para que as crianzas sensibilizadas e os adultos acompañantes puidesen ver o entorno e desfrutar da actividade no entorno no cal se levan a cabo as actividades marisqueiras.
Así, sensibilizouse sobre a importancia do marisqueo, o uso compartido do espazo co ocio, e a necesidade do respecto mutuo no uso dos espazos compartidos. A través de pósters informativos e unha unidade didáctica con contidos e actividades sobre aspectos de interese para a OPP20, nenas e nenos puideron coñecer máis sobre a zona costeira na que se atopaban.
Foron escenarios desta actividade as praias do Bao, Camaxe, Conserrado, Xastelas, Cabodeiro e Aguiuncho. Un total de 134 nenos e nenas, así como 49 homes e mulleres pasaron pola carpa itinerante este verán na Illa de Arousa.
Acción incluida no PPeC 2022 da OPP20, cofinanciada polo FEMP e a Xunta de Galicia.
