A Organización de Produtores de Marisco e Cultivos Mariños da Provincia de Pontevedra (OPP20) inaugurou este venres 23 de decembro o illamento térmico da Lonxa do Xufre, a súa innovación máis recente, pero non a última.
Marisco de a Illa é a marca que engloba ó marisco da OPP20, que se caracteriza pola súa calidade. Esta calidade innata atopa na Lonxa do Xufre a maquinaria e infraestrutura ideal para abastecer ó mercado sen perda algunha desa calidade da que presumen os areais da Illa de Arousa.
As innovacións na lonxa comezaron pola habilitación dunha área de estabulación para o almacenamento do famoso camarón da Illa e da súa tamén saborosa nécora vivos dende a súa captura ata a súa venda, para o mantemento da súa frescura. Esta área composta por tanques con circulación continua de auga de mar a temperatura controlada con mesas para a poxa especialmente deseñadas para estes produtos, ten un rigorosísimo control de aceso mediante tarxetas electrónicas identificativas.
Case ó mesmo tempo, comezouse a innovación na clasificación do marisco mediante maquinaria específica con control automático de peso e etiquetaxe inmediata permitindo un mellor control e trazabilidade do produto. Así, en 2020 foron adquiridas 2 máquinas que clasifican mediante vibración a ameixa xapónica e a babosa, mentres que entre 2021 e 2022 se adquiriron outras 2 para a clasificación da ameixa fina, unha especie moito máis delicada e que precisa dunha clasificación coidadosa. Esta última foi conseguida mediante o deseño dunha clasificadora por rodillos.
En 2021 tamén comezou a obra que hoxe se quixo inaugurar por ter finalizado neste ano 2022: o panelado da lonxa, que ten por obxectivo mellorar as condicións de comercialización do Marisco de A Illa mediante a preservación da calidade dos produtos da OPP, aumentando o illamento térmico na zona de venda dos mesmos, de forma que non se vexan afectados polas temperaturas externas, sobre todo no verán.
O acto contou coa presenza dos concelleiros de obras e de servizos da Illa de Arousa, Alfonso Salgado e Luís Arosa respectivamente, e da conselleira do Mar da Xunta de Galicia, Rosa Quintana, ós que a recén nomeada presidenta da OPP20, Inmaculada Rodríguez, e o patrón maior da Cofradía de Pescadores San Julián, Juan José Rial Millán recibiron para mostrarlles a finalización das obras, así como as últimas innovacións da Lonxa do Xufre que vimos de describir, todas desenvolvidas ó amparo do Plan de Produción e Comercialización da OPP20, financiado polo FEMP e a Xunta de Galicia. Tamén estivo presente Juan José González do PP da Illa. Todos se mostraron realmente compracidos coas iniciativas levadas a cabo pola OPP e destacaron a súa gran labor por levar os produtos da Illa de Arousa máis alá das súas fronteiras.
A conselleira destacou a gran labor innovadora da OPP dende 2015, co apoio da Consellería e do FEMP, con investimentos que superan os 200.000€ para a mellora das condicións tecnico-sanitarias da lonxa do Xufre.
E como comentaron patrón maior e presidenta, as innovacións na lonxa non rematan aquí, pois en 2023 está prevista a instalación de paneis solares que fagan deste enclave marisqueiro un lugar máis eficiente enerxéticamente e polo tanto máis respectuoso co medioambiente, así como estudar as necesidades para a instalación a medio-longo prazo dunha depuradora e da venda directa dos produtos da OPP20, chegando así do mar ó prato.
Posteriormente a conselleira e concelleiros puideron visitar O Canto do Mar, a Aula de Interpretación que a organización inaugurou o pasado outubro.
Destacar que os produtos da OPP20 están abalados por PescadeRías como produtos de proximidade, o selo PescaEnVerde de produtos sostibles e con baixa pegada de carbono, así como co selo craega para as súas algas que certifica a súa procedencia de agricultura ecolóxica. Do mesmo xeito, a marca Marisco de A Illa
