A OPP20 colaborou esta tarde na programación de catas e degustacións de produtos do mar de Galicia organizadas pola Consellería do Mar no stand da Xunta de Galicia na Feira Salimat 2022.

Baixo o nome de “GALICIA SABE AMAR: MARISCO E ALGAS DE A ILLA, UN MAR DE TRADICIÓNS E SABORES”, a Organización de Produtores de marisco e cultivos mariños da provincia de Pontevedra, puxo en valor o traballo dos seus produtores e produtoras da man do seu Presidente, Juan José Rial Millán e do vídeo elaborado para a ocasión “Un mar de tradicións e sabores” (https://www.youtube.com/watch?v=jfp7RvoIP6U).

O alcalde da Illa de Arousa estivo presente, mostrando unha vez máis o seu apoio á Organización de Produtores e ós produtos da Illa, e destacando a labor realizada pola OPP para a promoción do marisco e das algas recollidas polos mariscadores e mariscadoras do seu concello.

Os produtos seleccionados para a degustación foron a ameixa rubia e o longueirón na parte dos mariscos, e o codium e o wakame en canto a algas. A ameixa rubia é unha das principais especies de marisco comercializadas pola OPP e tamén das máis valoradas, mentres que longueirón é un vello coñecido que está pouco valorado, e que a organización quere destacar grazas a este tipo de actos. En canto ás algas, ambas son especies principais da OPP, sendo o codium unha especie cada vez máis valorada gastronómicamente.

Ambas especies foron preparadas por Emma Pinal, cociñeira de Gastrobar o Birrán en Ribadavia. A ameixa e o wakame servíronse con arroz, mentres que o longueirón desfrutou da compaña do codium preparado en allo verde.

Mariscos de A Illa é a marca creada pola OPP20 para destacar a alta calidade dos seus produtos e a sustentabilidade dos mesmos certificada polo selo PESCAENVERDE. As algas recollidas polos produtores da Illa están tamén certificadas como de agricultura ecolóxica polo selo CRAEGA.

Un mar de tradicións e sabores quere tamén destacar a tradición e cultura marisqueira da Illa de Arousa, poñendo en valor unha actividade primordial para a poboación insular.

Esta medida está enmarcada no PPeC 2022 da OPP20, cofinanciado polo FEMP e pola Xunta de Galicia.