A principios deste ano pechábanse todos os bancos de libre marisqueo na ría de Arousa, tres meses antes do que é habitual. Así o decidiu a Asociación Rañeir@s, da que forman parte mariscadores e mariscadoras de a flote da OPP20, debido á delicada situación dos recursos e para intentar salvar as demais campañas do ano.
A Plataforma en Defensa da Ría de Arousa, da que tamén forma parte a OPP20, vén de denunciar a diminución da produción da ameixa fina, babosa ou loura na ría en máis do 60% nos últimos 10 anos, tras realizar un estudo comparativo de bivalvos que comezaron en 2013. No caso do berberecho a caída é dun 23% de media nos últimos 20 anos.
As perdas económicas estímanse para os mariscadores e mariscadoras da Arousa en preto de 10 millóns de euros para 2022. Isto supón un gran golpe para miles de familias que dependen deste sustento económico, e máis na situación actual de alza de prezos en produtos e servizos básicos para vivir.
A ría está sufrindo un deterioro progresivo que se ve traducido na perda de permex pola falta de recursos. Dende o sector sinalan que nas rochas do interior da ría non se ve nin arneirón nin mexilla, indicador de que a situación é cando menos preocupante.
Por estas razóns, o sector lanzou unha nova chamada de socorro á administración autonómica competente, a Consellería do Mar, para que deseñe un plan de actuacións firmes e serias que poidan reverter a situación e axudar ó sector, que teme pola súa supervivencia futura.
Entre as medidas sinaladas polo sector está a dotación económica, material e humana para paliar os efectos desta situación, incluíndo un amplo e rigoroso estudo científico que poida arroxar luz sobre as causas que motivan o deterioro produtivo da ría, e un plan urxente de rexeneración para garantir a próxima campaña.
Dende a Asociación Rañeir@s, e tamén a modo particular dende a OPP20 e a Confraría da Illa de Arousa, véñense reclamando estas medidas de repoboación de bancos marisqueiros que non poden ser abordadas na actualidade só cos recursos das entidades do sector, e que deberían contar con dotación suficiente por parte da administración autonómica. A situación aseméllase grave, e dende a OPP20 seguirase traballando arduamente para conseguir un futuro próspero e sostible para a actividade marisqueira da que dependen gran parte das familias da Illa.
