Persoal da OPP20, así como mariscadoras e mariscadores da entidade, participaron este mes de xullo na iniciativa MAReILLA para a sensibilización ambiental en bancos marisqueiros, continuando coa iniciativa do 2022 de fomentar o traballo de sensibilización a pé de praia.
Desenvolvéronse un total de 5 xornadas de sensibilización de duración de hora e media cada unha delas, consistentes nun pequeno taller teórico onde se explicaban nocións básicas da actividade marisqueira, artes e útiles que utilizan, especies recolectadas, o concepto de talla mínima, así como a importancia do respecto e coidado do medio mariño, da recollida de lixo no litoral, ou da loita contra o furtivismo. Todo isto embebido da importancia da convivencia dos usos do litoral: deportes, marisqueo, turismo, …, e por suposto a actividade marisqueira.
Este ano participaron nenos e nenas da Ludoteca da Illa de Arousa, así como da Fundación Deportiva Municipal, sempre en grupos abertos ós que se podía unir público xeral que estivese nas praias onde se organizaron as xornadas e que mostrasen interese nas mesmas.
Así, realizáronse actividades nos días e lugares que figuran a continuación:
Mércores 5, levouse a cabo unha xornada de sensibilización, pero como eran nenos e nenas de curta idade, dividiuse ó grupo en dous para traballar mellor con eles. Así, fixéronse dous horarios: 10:30 e 12:00 – Parque Natural do Carreirón.
Venres 7, desenvolvéronse dúas xornadas de sensibilización con dous grupos diferentes: 11:00 e 13:30 – Praia do Cabodeiro.
Luns 17 e mércores 19, realizáronse cadansúa xornada en horario de 10:30 – Praia do Bao e 11:00 – Praia do Cabodeiro, respectivamente.
Un total de 108 nenos e nenas sumáronse á iniciativa e puideron compartir coa OPP20 tempo de lecer unido á aprendizaxe polo respecto á actividade marisqueira e ó medio onde se realiza.
Esta medida está enmarcada no PPeC 2023 da OPP20, cofinanciado polo FEMPA e pola Xunta de Galicia.
