A Organización de Produtores de Marisco e Cultivos Mariños da Provincia de Pontevedra, OPP20, que representa aos mariscadores e mariscadoras da Illa de Arousa, leva dende principio de ano traballando no desenvolvemento dunha acción de información aos consumidores que permita mellorar a información da trazabilidade dos produtos que recollen e comercializan.
Dende bivalvos tan coñecidos e apreciados coma a ameixa fina ou a navalla, pasando polo famoso camarón da Illa e sen esquecerse de produtos de gran importancia para os seus produtores e produtoras como son as algas ou a ameixa xapónica ou a roxa. Todos eles serán protagonistas desta iniciativa que pretende facer chegar ao consumidor final, pero tamén aos comercializadores-as, datos sobre a recolección e posterior venda en lonxa.
O consumidor final poderá acceder a esta información a través da páxina web da OPP20, www.opp20.com, ou a través das súas RRSS. Tamén en formato físico, en paneis situados na lonxa do Xufre.
A preparación de vídeos, paneis, carteis, animacións,… terá como obxectivo que o consumidor final saiba máis sobre a actividade marisqueira e o proceso que permite que o marisco e as algas cheguen ao seu prato, ben sexa na casa ou nun restaurante.
A información sobre o proceso permitirá ao consumidor saber que o que consume procede dunha actividade sostible e respectuosa co medio ambiente, dará nome ás persoas detrás desta actividade, permitirá coñecer como se prepara e se realiza a súa venda, dará información proveitosa sobre o produto e, en definitiva, cumprirá o obxectivo proposto de achegar toda a información posible ao consumidor final para que realice un consumo responsable de produtos do mar apreciando a calidade do que consome.
Toda a información posible será integrada ao mesmo tempo na Aula O Canto do Mar, situada na sede da OPP20, e que acolle principalmente excursións escolares pero que tamén está aberta ao público xeral, de forma que tamén sexa a través deste espazo onde se faga divulgación desta información de gran interese.
Vídeos de YouTube: https://acortar.link/R2PtFG
Exemplo de publicación en Instagram: https://acortar.link/WCHjJs
Esta acción levarase a cabo ao longo de todo este ano, e non se descarta continuar en 2025.
Esta iniciativa é parte do Plan de Produción e Comercialización da OPP20 para a presente anualidade.
