A lonxa do Xufre rexistrou no mes de xullo un volume total de 22.706,70 kg de marisco e algas comercializados, segundo datos da Organización de Produtoras OPP20. A especie máis vendida foi, con diferenza, a ameixa rubia (Venerupis rhomboides), que acadou os 6.320,90 kg.
Esta ameixa, de cor parda clara e cun debuxo característico en forma de cuadrícula ou liñas transversais, é unha das especies máis recoñecidas e recolectadas nas augas da ría de Arousa. Vive semienterrada en substratos de area ou mestura de area e lama e extráese mediante marisqueo a flote, seguindo prácticas sostibles.
Desde o punto de vista biolóxico, a ameixa rubia presenta unha reprodución de tipo sexual con fecundación externa. O período reprodutivo principal vai de maio a agosto, aínda que pode variar segundo as condicións ambientais. Durante este tempo libéranse os gametos ao medio mariño, onde ten lugar a fecundación. Tras a fase larvaria, as ameixas fixan ao fondo e comezan o seu crecemento, que se intensifica durante os meses máis cálidos. O verán é, polo tanto, unha época clave para o engorde da especie, mentres que a colleita se realiza tendo en conta tanto a talla mínima como o estado fisiolóxico do bivalvo.
O dato total de xullo supón unha diminución respecto á media mensual do primeiro semestre, que se situou nos 36.534 kg. Esta baixada explícase pola caída no volume de algas comercializadas, xa que no sétimo mes do ano as descargas foron notablemente menores que en meses anteriores. En total, comercializáronse 3.500 kg de correa, 975 kg de leituga de mar e 220 kg de ramallo de mar.
Estes datos forman parte do seguimento realizado pola OPP20 no marco do seu Plan de Produción e Comercialización 2025, e compleméntanse coa campaña informativa “Que hai esta semana na lonxa?“, coa que se pretende manter informados tanto aos clientes profesionais como ao consumidor final sobre as especies dispoñibles, os métodos de extracción e a trazabilidade do marisco de A Illa.
