Durante os meses de maio e setembro de 2025, a Organización de Produtores OPP20 impulsou un novo ciclo de obradoiros de cociña saudable con marisco e algas locais, enmarcados no seu Plan de Produción e Comercialización, co obxectivo de promover unha alimentación equilibrada e dar a coñecer os produtos do mar de A Illa de Arousa.
Obradoiros infantís en colaboración co CEIP Torre Illa
Os días 6, 7, 8, 21, 22 e 23 de maio, celebráronse os obradoiros infantís na antiga lonxa da Illa, en colaboración co CEIP Torre Illa. Participaron 11 clases, desde 1º ata 6º de Educación Primaria, cunha media de entre 15 e 20 nenos e nenas por grupo, é dicir, arredor de 200. A actividade foi conducida por Mariví Pérez, cociñeira do Chiringuito Coco Bao, e estivo orientada a experimentar con novos sabores a través do xogo e a manipulación de alimentos.
Os máis pequenos elaboraron masa de pizza con wakame e prepararon espagueti de mar rebozado, descubrindo así a diversidade de algas comestibles presentes no seu contorno.
Obradoiros para adultos en setembro
Xa no mes de setembro, os días 16, 17 e 18, celebráronse os obradoiros para persoas adultas na cociña do Chiringuito Coco Bao, cun total de 32 asistentes. Nestes encontros, tamén dirixidos por Mariví Pérez, presentáronse receitas saudables e innovadoras elaboradas con produtos frescos da OPP20, como:
-
Risotto de ameixas
-
Langostinos con espagueti de mar
-
Ceviche de longueirón
-
Hummus con wakame
Estes pratos puxeron en valor produtos como a ameixa rubia, o longueirón, o espagueti de mar (Himanthalia elongata) e o wakame (Undaria pinnatifida), todos eles procedentes do marisqueo sustentable da Illa.
Todas as receitas elaboradas durante os obradoiros están dispoñibles na sección específica da web da OPP20:
Obradoiros de Cociña Saudable | OPP20
Esta acción forma parte das actividades de posta en valor do marisqueo e dos seus produtos, cofinanciadas pola Xunta de Galicia e a Unión Europea.
