Guía das praias da Illa de Arousa
As nosas praias. A nosa riqueza é unha publicación divulgativa impulsada pola OPP20 – Organización de Produtores de Marisco e Cultivos Mariños da Provincia de Pontevedra no marco da súa medida de trazabilidade, co obxectivo de achegar á cidadanía unha visión clara e rigorosa da orixe dos recursos mariños da Illa de Arousa e da contorna na que se desenvolve a actividade marisqueira.
A guía percorre as praias da Illa de Arousa describindo a súa localización, características xeográficas, usos tradicionais e os principais recursos mariños asociados a cada zona. Deste xeito, contribúe a reforzar a relación entre produto, territorio e persoas produtoras, poñendo en valor a trazabilidade como ferramenta fundamental de transparencia, identificación da orixe e confianza do consumidor.
A publicación é froito dun traballo de investigación desenvolvido polo alumnado de 4º da ESO do IES da Illa de Arousa, en colaboración coa OPP20, combinando o enfoque educativo co coñecemento profesional do sector marisqueiro. O proxecto promove o coñecemento do patrimonio natural costeiro, a transmisión de saberes ligados ao mar e a concienciación sobre a importancia dunha explotación sostible dos recursos mariños.
Esta guía forma parte das accións de comunicación da OPP20 orientadas a mellorar a visibilidade do marisqueo da Illa de Arousa, reforzar a trazabilidade dos produtos marisqueiros e poñer en valor o traballo das mariscadoras e mariscadores, desde o banco marisqueiro ata o consumidor final.
Medida enmarcada no Plan de Produción e Comercialización da OPP20, cofinanciado polo FEMPA e a Xunta de Galicia.
