O CEIP Torre Illa colabora coa OPP20 para organizar as visitas dos máis cativos da Illa á aula de interpretación inaugurada en outubro de 2021.
Dende a súa inauguración, pola aula #OCantodoMar pasaron maiores e cativada para desfrutar aprendendo a historia e a actualidade dunha actividade de vital importancia en Galicia, pero máis se cabe no entorno da Illa de Arousa porque é o sustento económico dunha gran parte dos seus fogares.
Se o alumnado da Escola Superior de Hostalería de Galicia quedou encantado coa súa visita, o do CEIP Torre Illa xa é asiduo visitante deste recuncho cheo de información, ferramentas e utensilios da actividade que desenvolven os produtores e produtoras da OPP20 no seu día a día, ou asociados á historia do mar na Arousa.
Así, os máis cativos veñen visitar a aula, desfrutando dunhas horas de aprendizaxe demostrativa, con moitísimo estímulo audiovisual e explicacións de primeira man dos expertos e expertas do marisqueo que forman a gran familia da Organización de Produtores. Vídeos, charlas explicativas, traballo manual con cunchas ou incluso con marisco vivo se é posible, e tamén sensibilización polo coidado do medio mariño traballando co material de SENSIMAR, outra gran iniciativa da OPP20, son varias das actividades que o alumnado do CEIP Torre Illa realiza nas súas visitas a #OCantodoMar.
Pola aula pasou xa o alumnado de 1º, 2º, 3º e 4º de primaria. Máis de 100 cativos e cativas que se mostraron totalmente participativos e ávidos de coñecemento nestas xornadas tan fermosas de aprendizaxe conxunta entre o sector marisqueiro e os centros educativos.
Seguimos con emoción mostrando ó mundo a importancia da nosa actividade!
