A Organización de Produtores de Marisco e Cultivos Mariños da Provincia de Pontevedra, OPP20, que representa aos mariscadores e mariscadoras da Illa de Arousa, comezou esta tarde os Talleres de Cociña para a promoción de consumo de marisco e algas de A Illa.
Carmen García, da OPP20, deulle a benvida ao primeiro grupo en realizar este Taller (en total son 3), agradecendo á Xunta de Galicia e á Unión Europea os fondos precisos para poder levalo a cabo. Carmen recordou ás asistentes os beneficios de consumir marisco, pois é fonte de iodo, ten un alto contido en ferro e posúe proteínas de alto valor biolóxico, que unido á súa doada dixestión e á baixa porcentaxe de graxas que contén, fan del un compoñente ideal nunha dieta saudable. Do mesmo xeito, destacou que as algas son unha fonte rica en vitaminas e minerais esenciais, como o iodo, o ferro, o calcio ou o magnesio e varias vitaminas do complexo B. Tamén son unha excelente fonte de proteínas e conteñen todos os aminoácidos esenciais que o noso corpo necesita.
Para estes talleres, a OPP20 conta coa colaboración do Chiringo Coco Bao da Illa de Arousa, e da súa cociñeira Victoria Otero, que comezou o taller falando das algas e das súas posibles preparacións e propiedades, xa que son menos coñecidas cás do marisco. Por exemplo, a alga kombu posúe iodo, fibra e diferentes minerais, pódese consumir fervida polo menos durante 1 hora para incorporar a caldos e con legumes, sofrita como guarnición ou recheo, ou en tortilla de pataca, ao forno en empanadas ou quichés, e incluso en potaxes. A wakame é rica en calcio, iodo e potasio e pode consumirse incluso crúa despois dun remollo en auga durante 35 minutos para ensalada ou gazpachos, tamén fervida para sopas, salsas ou ensaladillas, frita como guarnición ou recheo ou en tortilla, ao forno en empanada, pizza, pan, quiches, galletas e guisada en estofados.
Tras esta breve explicación e tras mostrar as algas en cru ás asistentes (neste grupo foron todas mulleres) comezou a preparación, entre Victoria e as asistentes, das 4 receitas que forman parte deste taller:
- Tapenade de olivas e kombu.
- Panipuris recheos de bechamel de alga wakame e cogomelos “Portobello”.
- Navallas con veganesa de cítricos e froitas vermellas.
- Carneiros á tixola en salsa verde.
Victoria ía explicando as receitas e os trucos para que saian mellor conforme ía repartindo os traballos de pelado, cortado, triturado ou emplatado entre as asistentes. Ao final todas degustaron os pratos, quedando marabilladas co resultado.
O mércores 5 e o xoves 6 de xuño son os outros dous talleres, que terán como protagonistas as mesmas receitas e os mesmos produtos da OPP20: kombu, wakame, navalla e carneiro.
Esta iniciativa é parte do Plan de Produción e Comercialización da OPP20 para a presente anualidade.
