Reparto de material para a sensibilización dos máis maiores a pé de praia.
Este verán a OPP20 levou a cabo varias iniciativas para a concienciación sobre a importancia do coidado do medio ambiente, concretamente o medio mariño e os recursos asociados ó mesmo.
Se o mes pasado vos contabamos da acción de sensibilización co público infantil, Mar e Illa, hoxe vimos mostrarvos as actuacións informativas levadas a cabo co público sénior promovidas tanto dende a Confraría da Illa como dende a OPP20 como parte do proxecto PLANCTON de AFundación, do cal xa vos falaramos anteriormente (NOVA).
Estas actuacións nomeadas “Goza da praia sen deixar pegada” deron comezo en Punta Carreirón, onde se colocaron paneis informativos. Ó longo do verán leváronse a cabo percorridos polas praias da Illa de Arousa a cargo das mariscadoras da OPP onde se informaba ós turistas sobre as consecuencias de tirar lixo nas praias e no entorno mariño e se repartiron bolsas para a recollida deste, folletos informativos e cinceiros portátiles.
A iniciativa estendeuse ó resto de Galicia e incluso a outras comunidades autónomas, sendo a OPP20 pioneira na mesma, como parte das súas accións de sensibilización como a iniciativa BASURA MARINA (que deu lugar á actual) e a acción desenvolvida entre os seus socios e socias no ano 2022 para a recollida de cabichas repartindo cinceiros portátiles da OPP e con paneis informativos na lonxa e na sede da entidade.
Esta é outra mostra máis do compromiso da OPP20 co medio ambiente e o seu coidado para o futuro da súa actividade.
